Manifeste affirmant le caractère un et divers de la langue d'Oc

Quand parli de dialògue, lo pensi pas amb lei dirigents dau Collectiu Provença que se prenon per la votz dei provençaus, mai amb lei provençalistas sincèrs manipulats per leis amalgamas. La capitada (relativa) dau "còntramanifèste" s'explica aisadament per doas rasons : 1) es verai que la lenga provençala es la de Provença e que fau defendre la cultura provençala (mai es faus que lo provençau siga distint de l'occitan e que l'occitanisme menace leis expressions culturalas de Provença), 2) lei discors paranoiaquets, dins un contèxte d'ignorància e de complèxes diglossics, son pron eficaçs.

L'occitan coma "lenga referencia unenca" es, coma o ditz amb rason Felip Martèl, un mite. D. Sumien, que Sénher Gourgaud considèra coma un "ayatollah", prepausa dins sa tèsi una estandardizacion pluricentrica, que supausa un respècte dei caracteristicas gramaticalas dei dialèctes; la nòrma de la recenta "Acadèmia occitana" còntraditz la dau Conseu de la Lenga Occitana; leis escrivans, fòra lei questions purament graficas, redigisson seis òbras dins la lenga que vòlon. Se i deu aver una nòrma, es per ajudar l'ensenhament.