#232: Ive Gourgaud - Re: Ont anam ?

Sénher Gourgaud e "Cecilia" : Siáu consent, d'acòrdi sus lo constat. Lo bilanç de l'occitanisme (disi pas de la literatura occitana - ò "occitanenca", se preferissètz lo mot) provòca ges d'estrambòrd : l'ensenhament es francament insufisent e, mai que mai, la difusion de la lenga dins la societat, per lo mejan mai naturau, la transmission intergeneracionau, es gaireben inexistenta... Me geina pas que i aga d'autreis assags per valorizar çò que rèsta, clarament, per ieu, LA lenga d'òc, mai tròbi que lo combat deis antioccitanistas (Sénher Gourgaud, me semblatz mai un non-occitanista qu'un antioccitanista vertadier) ven afeblir çò qu'es ja feble e tuar çò qu'es a agonizar...

Per ieu, una prioritat : la transmission entre lei generacions. L'error dau Felibritge, puei de l'occitanisme, foguèt de crèire que se podiá sauvar una lenga per la literatura, mentre que la populacion occitana demorava largament illetrada dins sa pròpria lenga. E mai l'ensenhament es inutil se i a pas de transmission dins lo mitan familiau. Cèrtas, lo malhum dei Calandretas a son utilitat, e ne'n sosteni de segur lo principi, mai se la lenga se parla plus a l'entorn pròche deis escolans, l'occitan (ò "l'occitanenc") es una lenga de l'escòla, amb leis aspèctes negatius qu'aquò implica.

Avètz donc rason, Sénher Gourgaud, de chifrar a la mesa en plaça de çò que podriam sonar de "nuclèus lingüistics", indispensables a la (re)vitalizacion de la lenga nòstra.

Gramecis per aquesto countribuciu, que dis, ço'm par, las causos essencialo, las de nostre malastre coumu: la soucieta nostro qu'abandouno, d'à cha pau, sa lengo e emb'elo la part mage de sa civilisaciu, de soun biais d'èstre au mounde. Vaqui la tragedio, e sièi mai que segu que la sentissès tant fort, tant grèu coumo ieu, coumo nautres.

Aro, dequé fa, à despart de se desespera ou assaja de trouba din l'endeforo de causo per nous desdouana de nosto culpo ?

L'unita, verta! Mè din lous tems nostre, es uno ilusiu de pensa que l'unita se fara per la forço (seriè mèmo la forço das idèio) à l'entour das us ou das autre: LA lengo oucitanenco cronto LAS lengo oucitanenco. l'unita, se se fai, se fara per la negouciaciu entre l'oucitanisme, lou prouvençalisme (ou meiour di: l'Alianço das lengo d'o) e lou Felibrige qu'aici aura de jouga soun jo de mediatour e d'encouraja lous rescontre. En dequé pouriè servi de se rescountra?

1) Se counouisse ! Vesès aici, coumo ieu, que fin finalo de mounde que semblàvou lest à se tuia pòdou discuti.

Counouissièi pa JF Brun (èro pa qu'un noum d'oucitanisto per ieu): valiè la peno de lou descoubri! Un ome que, es vesedou, aimo sa lengo de touto sas tripo, de-segu qu'es un interloucutour! Sens parla de soun trabaias su lou mountpelieiren qu'es de premièiro, li avès tout ço que fòu per counouisse e aima ço que sèn counsent, un e l'autre, per dire de "dialete mountpelieren"

E vous tabé, e n'en sièi soulide lou B. Peiras, se pren lou tems d'argumenta (ço qu'empacho pa, hou tourne à dire, uno espressiu vivo de las idèio: fin finalo, noste biais viu de parla aici, es uno bono provo que la lengo es vivo, parai?)

2) Saupre d'un biais tranquile se VOULEN, pièi se POUDEN fa quicom ensem: es aici que vosto idèio (belèu qu'es pa vostro, mè es vous que n'en parlas aici) de "nuclèus lingüistics" poudriè prene tout soun ample: e d'uno, li a foço iniciativo que se poudrièu prene, à moun avejaire, d'un biais decentralisa (vole dire per esemple: aici, entre lous "oucitan cevenòu e nautres, lou nuclèu poudriè prene de decisiu sens demanda l'avejaire de quau que siègue, un cop que sèn d'acòrdi entre nautres) Acò seriè pa, de-segu, din l'amiro d'escafa las diferencio, mè per "faire embé". Per esemple, se poudriè pensa de fa ensem un journalet, que la mita seriè per lous oucitanisto e l'autro mita per nautres, cadu emplego sa lengo e sa grafio, sens voudre teourisa din lou journalet nostos diferencio. Dirian ço que fasèn, cadu de soun cousta ou toutes ensem, segoun l'escasenço. Aqui aurias uno unita DIN LOU COUNCRET, emb'un jo gagnant-gagnant. E s'avèn, un cop, pa res à dire, las pagino liberado per noste noun-trabal servirièu as autres, de plen dre! Ansin li auriè coumo uno meno de coumpeticiu: braves ami, nous fòu trabaia se voulèn emplena nostos pagino!

E de dos, aqueste biais de fa nous fourçariè toutes de veire ço que fan lous autres, forço fourçado!

ço que dise aici se poudriè fa aici en Ceveno sens trop de proublemo... Mè endacom mai? Me semblo que la proupourciu poudriè èstre discutido: proubable qu'en Prouvenço foudriè laissa mai de pagino as mistralen (encaro que... li a de-segu de "nuclèus" que soun mai oucitanisto que prouvençalisto, nou ? Au cronto, en Lemousi que lou mistralisme grafico fai de tems que li es pa pu, foudriè belèu pensa de crea un nuclèu embé lous patesejaire?

Enfi, cade nuclèu counouiguent sa situaciu, se poudriè pensa d'establi un modus vivendi generau (su lous principi) avans de laissa lous nuclèu fa lus trabal.

De-segu que li a de prepausiciu belèu mai inteligento qu'aquesto... mè sens nous rescountra, coussi poudren causi las iniciativo ?#233: DanièlOlivar - Re: Re: Ont anam ?