#264: DanièlOlivar - Re: Re: Seul un vote populaire...

Quand disès que "lo manifèste per l'unitat parla pas de grafia", nous deu pa empacha de discuti de la questiu, que savès coumo ieu qu'es uno entrepacho foundamentalo per l'unita coumpleto. Es mai qu'evident que din la pedagougio per esemple, poudèn pa (à la debuto) presenta nosto lengo din dos ou mai grafio: n'en fòu be causi uno. E un cop que lou mounde an averti (abitua) uno grafio, savès coumo ieu de quant es malaisi de ne cambia: li a las coustumo que soun estado preso (en prou pati, mai d'un cop), li a tabé uno ESTETICA de la grafio que fai qu'un JF Brun atrobo "mai classico, mai eleganto" la grafio oucitano que noun pa la mistralenco... Aqui lou Couleitiéu prouvençau a uno pausiciu forto e claro: vòu la grafio mistralenco (e elo souleto) per Prouvenço souleto; per endacom mai, s'en foùtou qu'es pa lus proublemo. Ieu ai la mèmo pausiciu raport au cevenòu...

E quouro me disès : "avètz signat lo còntramanifèste (pròva de mai que lei partisans de la "diversitat" fan essencialament d'antioccitanisme)", laissa-me pensa que voste "essencialisme" es pa lou miu ! De-segu, dinc un escàmbi poulemico, se po veire pa que lou cousta negatiu d'un manifesto: din lou vostre, pode veire l'ataco cronto lous pluralisto, trata de "gropusculs" sens cienço ni eime, etc. e douncos afourti que lous sinnatàri soun d'anti-pluralisto ferouge, etc. etc.... coumo vous, poudès (e hou fasès!) dire que s'ai sinna lou cronto-manifesto es per sa partido anti-oucitanisto, que vole pa nega mè qu'es PA QU'UNO PARTIDO. Soulamen que tout acò demoro pa que de poulemico: se voulèn avança, foudra acoumença d'estudia ço que disou lous us e lous autre DE POUSITIU.

Per quant à voste dire que  respete  "pas completament la grafia mistralenca", n'en vole be discuti aici, embé vous coumo embé de felibre, amai serièu de reire-baile ou de reire-capouliè ! Basto d'acoumença per me dire EN DEQUE ma grafio seriè "pas completament" mistralenco ? Acoumençaren belèu per agacha lou Tresor de Mistral, veire un pau ço qu'escrive de tant anti-mistralen?  mous PA e PU, qu'escrive sens -S ? Avès que de coustata que soun din lou TDF (e PA es nouta coumo "roudanen", voulent-à-dire qu'es uno grafio "mai mistralenco" que lou PAS!).

Vesès, sièi (enfi, assaje) d'èstre un mistralen un pau inteligent, dounco un pau curious e critico, s'es lou di... Acò per me destria'n pau d'aqueles "mistralen" dau gros grun, d'aqueles catau que nous voudrièu douna de leissou de mistralisme coumo s'avièu eles la Verta revelado en la matèrio, e que mésclou mistralisme e "felibrisme" (que SA Peyre disiè poulidamen "febrilisme"!)

#267: Ive Gourgaud - Re: Re: Re: Seul un vote populaire...

Pensavi subretot a nòstrei discussions sus l'accentuacion mistralenca... Mistral auriá pogut escriure "pa", "Frederique", "ena", mai preferiguèt "pas". "Frederi", "uno". Voliá pas solament una grafia, mai una nòrma que, coma tota nòrma, s'aluenha de çò tròp locau per prepausar de chausidas mai generalas que, de còps, pòdon semblar artificialas, mai respòndon a una ambicion : bastir una lenga comuna, e non pas restar dins l'etèrne esbrenament dei parlars que seràn jamai de lengas mai de "patois". Sensa parlar de son intolerància ridicula (se fau enebir la grafia classica en Provença, perqué pas tanben cremar l'òbra de Miquèu Miniussi?), vòstreis amics dau Collectiu Provença (disi "vòstrei", bòrd que signatz un manifèste amb elei) son pas solament fòrça pauc mistralencs per son refús de l'unitat de la lenga, mai tanben pr'amor que vesi pas en cò sieu la mendra reflexion sus la nòrma. Rodanenc es pas mistralenc, e grafia es pas nòrma.

L'enjòc, lo solet, es d'aver d'ambicion per la lenga. Aquesta ambicion, la vesi mai o mens dins l'occitanisme, maugrat sei defauts.